Памятаем і беражом спадчыну сваіх продкаў. Гарадзеншчына
У рамках Года гістарычнай памяці калегі з Гродзенскага абласнога ўпраўлення Дзяржпрамнагляду азнаёміліся з экспазіцыяй Музея пісанкі Сапоцкінскага культурна-турыстычнага цэнтра Гродзенскага раёна.
Сапоцкін - невялікае маляўнічае мястэчка ў 30 км ад г. Гродна са сваёй багатай гісторыяй і культурай. У экспазіцыях культурна-турыстычнага цэнтра можна азнаёміцца з экспанатамі, якія расказваюць аб дарэвалюцыйным жыцці пасёлка, яго слаўных старонках часоў Вялікай Айчыннай вайны, сабрана калекцыя макетаў праваслаўных і каталіцкіх храмаў Гродзеншчыны.
А калі шукаеце нечага незвычайнага - вось вам музей велікоднага яйка! Тут сабрана 1,5 тыс. экспанатаў, прычым экспазіцыя увесь час пашыраецца. У яе ўвайшлі больш за 600 велікодных яек, распісаных уручную: гусіныя, страусавыя і нават перапёлчыны.
Навошта было ствараць цэлы музей, прысвечаны яйкам і чаму менавіта тут? Справа ў тым, што традыцыйныя велікодныя пісанкі з Сапоцкіна і тэхналогія іх вырабу ўнесены ў Дзяржаўны спіс гісторыка-культурных каштоўнасцей Беларусі - як элемент нематэрыяльнай культурнай спадчыны. І больш за тое, яны прэтэндуюць на ўнясенне ў аналагічны спіс ЮНЕСКА.
А яшчэ пісанка спрадвеку лічылася моцным абярэгам. Самаму старому размаляваным яйку, якое тут захоўвацца - 17 гадоў (!). Не, яно не пустое, усярэдзіне ёсць і бялок і жаўток. Сакрэт у тым, што яйка пасля размалёўкі нельга рухаць з месца на працягу года. Калісьці так да Вялікадня рыхтаваліся ці ледзь не ў кожнай хаце ў Сапоцкіне і наваколлях. Сёння векавую традыцыю адрадзілі.
Напярэдадні свята Вялікадня, якое адзначаецца на Гродзеншчыне і праваслаўнай, і каталіцкай канфесіямі, падчас майстар-класа дзяржпрамнаглядаўцы паспрабавалі вырабіць і распісаць не толькі велікоднае яйка, але і пазнаёміцца з тэхнікай вырабу велікодных вербачак, убачыць калекцыю рарытэтных паштовак да галоўнага хрысціянскага свята.
